Perlur Kvikmyndasafnsins

Egill Helgason og Gunnar Tómas Kristófersson skoða myndefni sem tengist börnum. Við sjáum börn í skólum, sumarfríi, í sveit og við leik og íþróttaiðkun. Sumt efnið er svarthvítt og annað í lit og margar myndirnar hafa frumkvöðlar í íslenskri kvikmyndagerð tekið. Hlutverk Kvikmyndasafns Íslands er líka skoðað.

Farið er aftur í upphaf kvikmyndagerðar á Íslandi og fjallað um frumkvöðla eins og Bíó Pedersen, Loft Guðmundsson, Óskar Gíslason og Kjartan Ó. Bjarnason. Auk þess er rannsóknarstarfið á Kvikmyndasafni Íslands kannað.

Fjallað er um tilraunir til að taka íslenskar fréttamyndir og koma þeim í almenna sýningu. Þrátt fyrir elju margra kvikmyndagerðarmanna reyndist það þrautin þyngri því markaðurinn var smár. Einnig er safnkostur Kvikmyndasafns Íslands skoðaður.

Egill Helgason og Gunnar Tómas Kristófersson skoða kvikmyndir af íþróttaiðkun. Þær eru margs konar, allt frá fótbolta til glímu og fimleikasýninga. Einnig er fjallað um vandann við að skanna efni á Kvikmyndasafninu þegar varðveislutækni er sífellt að breytast.

Fjallað er um menningarviðburði og hvernig fólk freistaði þess að koma menningu og listum til skila í kvikmyndum. Auk þess eru skoðaðir ýmsir skemmtilegir safngripir í Kvikmyndasafni Íslands.

Í þessum þætti fjöllum við um það sem við köllum hátíðavandann - tilraunir til að kvikmynda stórhátíðir sem Íslendingar héldu, líkt og Alþingishátíðina 1930 og Lýðveldishátíðina 1944. Það gekk stundum heldur brösulega og sumt misheppnaðist illa.

Egill Helgason og Gunnar Tómas Kristófersson skoða gamalt myndefni sem tengist jólunum og varðveitt er í Kvikmyndasafni Íslands. Þar eru meðal annars myndir frá jólaundirbúningi, jólaverslun, jólaboðum og jólatrésskemmtunum - af prúðbúnu fólki, kökum og jólatrjám, ýmist með rafljósum eða lifandi kertum.

Í þessum þætti förum við vítt og breitt um landið og skoðum myndefni frá stöðum sem nutu ekki alltaf mikillar athygli kvikmyndagerðarmanna. Við sögu koma ýmis farartæki, strandferðaskip, sjóflugvélar og kláfferjur.

Í þættinum fjöllum við um konungsheimsóknir til Íslands og kvikmyndir af þeim og síðar heimsóknir forseta Íslands í ýmis byggðarlög. Við sjáum hvernig hefðir sköpuðust í kringum þessar heimsóknir þjóðhöfðingja og ekki síst hvernig forsetaembættið nýja var túlkað í kvikmyndum.

Í þættinum skoðum við elsta efnið á safninu. Bæði íslenskir og erlendir myndhöfundar koma við sögu, ljósmyndarar sem fengu áhuga á hinni nýju tækni og hinn merki Bíó-Petersen sem tók upp íslenskt efni og sýndi í Gamla bíói.

Í þættinum skoðum við myndefni frá þeim tíma þegar Íslendingar fluttust úr sveitinni í sjávarþorp og til Reykjavíkur. Við fylgjumst með fornum atvinnuháttum og uppbyggingu ungrar borgar.