Stiklur

„Kögur og Horn og Heljarvík huga minn seiða löngum“ kveður Jón Helgason í Áföngum. Heimildarmynd þessa hefur Sjónvarpið látið gera í myndaflokknum Náttúra Íslands. Hún fjallar um eyðibyggð, og urðu Hornstrandir fyrir valinu sem dæmi. Þær eru hrikalegar og hlýlegar í senn. Þær lögðust í eyði fyrir þrjátíu árum, og nú hefur þessi landshluti verið gerður að nokkurs konar þjóðgarði. Í þessari mynd er reynt að lýsa einkennum Hornstranda og varpa ljósi á það, hvers vegna fólk fluttist þaðan. Einkum er fjallað um Sléttuhrepp, en þar bjuggu fimm hundruð manns, þegar flest var, og fluttust burt á fáum árum. Kvikmyndun Sigmundur Arthúrsson. Hljóð Marínó Ólafsson. Klipping Ragnheiður Valdimarsdóttir. Tónlist Gunnar Þórðarson. Umsjón Ómar Ragnarsson.

Þáttur um hina óvenju ríku sönghefð á svæðinu milli Blöndu og Blönduhlíðar, þar sem eru starfandi fjórir sérstakir kórar auk allra kirkjukóranna á svæðinu. Umsjónarmaður er Ómar Ragnarsson.

Farið bæði að sumri og vetri á landi og í lofti um hálendið norðan Suðurjökla, allt frá Emstrum til Vonarskarðs og Langasjávar. Slegist í för með gangnamönnum, ferðalöngum, unglingum og flugmönnum til þess að njóta tilbrigða og litadýrðar þessa svæðis. Umsjónarmaður er Ómar Ragnarsson.

Heimildarþáttur. Ómar Ragnarsson er á ferð og flugi um landið. Í janúar verða þættir úr smiðju hans öll sunnudagskvöld. Farið er með nútímafólki í fótspor Náttfara, sem margir telja fyrsta landnámsmanninn, allt frá suðausturströndinni til landnáms hans við Skjálfandaflóa. Þá er slegist í för með hvalaskoðunarfólki um Skjálfanda og Eyjafjörð, þar á meðal 16 ára enskum pilti sem langaði til þess að sjá hvali áður en hann dæi. Loks er stigið á land í eyðibyggðinni í Náttfaravíkum með manni sem þar er fæddur og uppalinn.

Á síðustu árum hefur samdráttur í landbúnaði orðið til þess að margir Öræfingar hafa nýtt sér möguleika til ferðaþjónustu á nýjan hátt, og slæst Ómar hér í för með feðgunum að Hofsnesi og kannar það.

Ferðast um slóðir útlaga fyrri alda, einkum þó Fjalla-Eyvindar, allt frá Hornströndum til Hveravalla, Eyvindarkofavers og Hvannalinda. Slegist í för með Birgi Brynjólfssyni, jöklabílstjóra. Umsjónarmaður er Ómar Ragnarsson.