Andrar Abroad

Í fyrsta þætti heimsækja nafnarnir þekktan tökustað úr þáttunum Mr. Bean við suðurströnd Englands, berja Stonehenge augum, biðja drottinn um styrk í sögufrægri kirkju og fylgjast með fólki hlaupa niður brekku á eftir osti.

Í Wales ræða nafnarnir hvernig það hafi verið að búa í kastala auk þess sem þeirdrekka alvöru te, skoða gröf sögufrægs veiðihunds, háma í sig fisk og franskar og heimsækja bæinn Llanfairpwllgwyngyllgogerychwyrndrobwllllantysiliogogogoch.

Nafnarnir fara yfir til Írlands með ferju og þar heldur leitin að Mr. Bean áfram. Í Dyflinni taka Andrarnir lagið með ekta götusöngvara, skoða Guinness-safnið hátt og lágt, virða fyrir sér styttu af forsprakka rokkhljómsveitarinnar Thin Lizzy og heimsækja furðulegt útvarpssafn.

Í Skotlandi fara nafnarnir í siglingu á Loch Ness þar sem þeir reyna að finna skrímslið fræga. Auk þess týnast þeir í risavöxnu völundarhúsi, nudda nefið á Greyfriars Bobby í Edinborg, skoða safn þar sem ruglað er í skilningarvitunum og heimsækja minnismerki um Braveheart.

Nú liggur leið nafnanna til Lundúna og hringurinn um Mr. Bean þrengist. Þeir fylgjast með varðskiptum fyrir utan Buckinghamhöll, villast í neðanjarðarlestarkerfinu, fá sér ís í Hyde Park og fara í alvöru skeggrakstur.

Í þessum síðasta þætti þeytast nafnarnir um Lundúnir í örvæntingarfullri leit að Mr. Bean. Þeir versla meðal annars í þungarokksplötubúð, læra ensku útgáfuna af keilu og villast aftur í neðanjarðarlestarkerfinu.