Galicia Bonita

No programa desta noite, a arquitecta Rosa Facal e os seus fieis axudantes, afrontarán o reto de recuperar a vella escola unitaria de Rial de Arriba, en Zas, como local social. Os propietarios, unha comunidade de veciños e veciñas do lugar, traballarán arreo para sacar o proxecto adiante, mentres saen á luz as diferenzas de criterios. O equipo de `Galicia Bonita´ deberá poñelos de acordo e restaurar as descoidadas edificacións no prazo máximo de cinco días de traballo.

Esta semana, o equipo de reformas e a súa arquitecta, Rosa Facal, achegaranse a Noia, onde se atoparán cun auténtico cascalleiro na leira de Pastora e máis Benigno. Os propietarios, cunhas reparacións moi cuestionábeis feitas no tempo na súa vivenda, amenizarán a semana dos traballadores con todo tipo de cancións populares deixando de lado a colaboración necesaria para levar a cabo as tarefas de recuperación.

No capítulo desta semana, o equipo de 'Galicia Bonita', coa súa líder Rosa Facal á fronte, chegará ata Curtis. Alí, deberán tratar con Mercedes, unha muller escaldada dunha obra anterior e cunha vivenda forrada por unha cuestionábel chapa. A minuciosa propietaria revisará ao detalle cada unha das tarefas feitas polos restauradores chegando a comprometer o desenvolvemento dunha obra aparentemente sinxela.

Esta semana, o equipo de `Galicia Bonita´, con Rosa Facal á cabeza, deberá arranxar o pendello de David e Cristina, na contorna única da basílica medieval de San Martiño de Mondoñedo, en Foz. A plena confianza que os propietarios depositarán na arquitecta e os seus colaboradores provocará contínuos cambios na reforma en beneficio do equipo, o que desembocará en diferenzas cos familiares de David. Ademais, Álex quedará fascinado coa beleza da antiga Catedral, que lle servirá de inspiración para a reforma do tellado do alpendre.

Desta volta, os operarios de Galicia estarán na comarca do Val Miñor. Por primeira vez na historia de Galicia Bonita, Laira, Álex, Javier, Carles e, por suposto, Rosa, aceptaron o reto de levar a cabo unha reforma no tempo récord de catro xornadas.

Nesta ocasión, o equipo de `Galicia Bonita´ percorrerá a península do Barbanza. A vivenda de Martín é unha casa feita a pedazos e ampliacións cun peche, unha cuberta e uns cochos para os cans en estado deplorábel. Rosa confía plenamente na disposición de Martín, porén, as complicacións dunha reforma comedida poden vir polas dificultades do dono da casa de conciliar o seu traballo habitual, en quenda de noite, cunha intensa semana de obras durante o día.

Esta semana o equipo de Galicia Bonita desprazarase ao Rosal para facer fronte a un vello retrete sen uso desde hai máis de 40 anos. A conformidade e a hospitalidade de Doralia, a propietaria da vivenda, provocará unha relaxación extra nos operarios que se verá reflexado no seu rendemento.

No programa desta noite, a arquitecta Rosa Facal e os seus axudantes deberán recuperar dúas construcións comunitarias na parroquia de Rozavales, en Manzaneda. A veciñanza solicitará axuda á líder de Galicia Bonita para restaurar un antigo forno e un lavadoiro en moi mal estado de conservación. Aínda que a obra non semella dun gran volume, o equipo terá que facer fronte a unha baixa de última hora que dificultará a entrega no prazo acordado máximo dunha semana.

Os premios.

O traballo de albanelaría, con demolicións, construcións e recuperación dunha vivenda tradicional, ocupará o groso das reformas na Fonsagrada. Rosa, ademais, adiantou que o xefe de carpinteiros non poderá estar toda a semana na obra, o cal reduce en gran medida a súa marxe de manobra.

Esta semana o equipo de reformas e a súa arquitecta, Rosa Facal, chegarán ata Valga, onde se atoparán cunha vivenda sen rematar desde hai máis de 25 anos. Os reducidos accesos dificultarán unha reforma en aparencia sinxela esgotando ata a extenuación aos traballadores. Por se fose pouco, Cruz e Álex, os propietarios da vivenda, apenas terán tempo para axudar na súa restauración.

Rosa e o seu equipo de reformas achegaranse ata a comarca do Carballiño para coñecer Boborás, concello rico en patrimonio arquitectónico e natural. A xefa de 'Galicia Bonita' anticipa unha semana con déficit de persoal nunha reforma que aínda non parece ter suficientemente clara tras unha ollada cunha propietaria un tanto dispersa.

Esta semana, o equipo de reformas visitará en Covelo a propiedade de tres irmás. María é dona dunha casa e Leo e Macu da outra. As diferenzas entre criterios estéticos delas traerán de cabeza a Rosa e aos seus axudantes, que deberán unificar ambas casas para conseguir un aspecto acorde á construción orixinal, duns cen anos de antigüidade. A falta de efectivos no equipo da arquitecta condicionará o éxito dunha complicada reforma centrada na pedra e na madeira.

Desta volta, Rosa e os seus fieis axudantes visitarán un vello muíño na fermosa vila mariñeira de Ortigueira. A paz que transmite esa antiga edificación e a súa contorna espertou na arquitecta un interese especial á hora de afrontar a súa reforma, a pesar de ter grandes dificultades para a súa execución.

No lugar de Beo, en Malpica, a arquitecta Rosa Facal e o seu equipo de axudantes terá que facer fronte a unha vivenda tradicional de dúas plantas deteriorada polo tempo. As dificultades principais estarán na parte posterior da propiedade de Eva e Josi, cunha leira abafada por cascallo, muros divisiorios e pendellos en semirruínas. Uns accesos insuficientes e as continuas escapadas laborais de José, xerente dunha barbaría nos baixos da casa, poñerán a proba o bo facer dun equipo de reformas, á fin ao completo após á volta de Javier e Laira.

En Monterroso, Rosa Facal atoparase cunha das reformas máis complicadas de Galicia Bonita a nivel estrutural. A desmontaxe dun tellado de madeira podrecido centrará os traballos dun equipo enorme de colaboradores na vivenda de Luz e de Jaime. Os propietarios farán todo o que estea nas dúas mans para sacar adiante unha obra marcada pola dirección de carpintaría a cargo de Álex, quen deberá afrontar o reto do deseño e instalación dun soportal e dun peche na propiedade.