Kveikur

Börnum með offitu fer fjölgandi í landinu. Offita hrjáir nær tíunda hvert grunnskólabarn utan höfuðborgarsvæðis. Fleiri börn leita á Landspítalann með alvarlega fylgikvilla eins og fitulifur, kæfisvefn og undanfara sykursýki. Stórtækari aðgerða er þörf til að snúa þróuninni við. Í seinni hluta þáttarins er fjallað um fólkið sem vildi ekki láta bólusetja sig við COVID-19. Rætur vantraustsins eru kannaðar og spurt hvort bólusetningarumræðan á Íslandi hafi verið nógu upplýst.

Íslenskar unglingsstúlkur eru ítrekað beðnar um að senda eða selja af sér kynferðislegar myndir á netinu. Í seinni hluta þáttarins fjöllum við um ferðir rússneskra herskipa nærri Íslandsströndum og aukna hervæðingu við landið.

Þórir Sæmundsson var rísandi stjarna á íslensku leiksviði. En eftir að kynferðisleg myndasending hans komst í hámæli árið 2017 hefur hann verið utangarðs og fær hvergi vinnu. Kveikur ræðir við Þóri og veltir því upp hvenær og hvernig fólk sem hefur misstigið sig á afturkvæmt í samfélagið.

Umræðuþáttur um leiðir til bættrar umræðuhefðar og betrunar fyrir gerendur sem ekki eiga heima í réttarvörslukerfinu.

Þegar heilinn skaddast getur það haft skelfilegar afleiðingar. Meðferð gæti bætt stöðu margra en hvorki ríki né sveitarfélög vilja greiða fyrir hana.

Fjallað er um stöðu brotaþola í réttarvörslukerfinu og ákall um breytingar. Í seinni hluta þáttarins er því velt upp hvort íslenskan geti staðið af sér fordæmalaus áhrif ensku á þetta örtungumál.

Vísbendingar eru um að ofskynjunarefni geti gagnast í meðferð við geðsjúkdómum. Rætt er við erlenda sérfræðinga sem hafa rannsakað áhrif slíkra efna og talað við Íslendinga sem hafa nýtt sér þau í lækningaskyni þótt þau séu ólögleg.

Kveikur er á ferð með fólki sem flýr frá stríðinu í Úkraínu. Í seinni hluta þáttarins er fjallað um hormónaraskandi efni í umhverfinu.

Tugir hugmynda hafa verið settir fram um vindorkuver á Íslandi. Vindmyllurnar yrðu háar og áberandi. Í seinni hluta þáttarins fjöllum við um fjárfestingarsvik á netinu. Tugir Íslendinga falla fyrir gylliboðum á hverju ári og tapa himinháum fjárhæðum.

Um tíundi hver sjúklingur verður fyrir mistökum heilbrigðisstarfsmanns, vanrækslu eða óhappi. Í þættinum er fjallað um öryggi sjúklinga og sögð saga Bergþóru Birnudóttur sem örkumlaðist við fæðingu eins stærsta barns sem hefur fæðst á Íslandi síðustu áratugi.

Sífellt fleiri börn leita á barna- og unglingageðdeild Landspítalans vegna skjáfíknar. Fjallað er um nýja íslenska rannsókn um skjánotkun barna og unglinga. Í seinni hluta þáttarins er fjallað um spurningar sem hafa vaknað um öryggi Breiðafjarðarferjunnar Baldurs.

Í þrjátíu ár hefur verið fjallað um fráflæðisvanda Landspítalans en minna horft til fólksins sem lendir á hrakhólum. Hefur eitthvað breyst á þessum þrjátíu árum? Og hvernig stendur á því að veikt, gamalt fólk nýtur ekki fullra mannréttinda? Í þættinum verður sjónum beint að öldruðu fólki og aðbúnaði þeirra. Í seinni hluta þáttarins verður farið inn í hinn óvenjulega skapandi hugarheim Svavars Péturs Eysteinssonar, sem er með ólæknandi krabbamein á fjórða stigi, og hversdagsleikinn dýrkaður með hliðarsjálfi hans, Prins Póló.